சாலை ஓரமாக சென்ற நபரை முட்டி தூக்கி பஸ் சக்கரத்தில் வீசிய மாடு, பரிதாபமாக உயிரிழந்த நபர் - அதிர்ச்சி வீடியோ வைரல்.!
நாகையில் சாலையின் ஓரமாக சென்ற நபரை, காளைமாடு ஒன்று முட்டி தூக்கி வீசிய சம்பவத்தில், அவர் அரசு பேருந்தின் சக்கரத்தில் சிக்கி பரிதாபமாக உயிரிழந்த சிசிடிவி காட்சிகள் தற்போது சமூக வலைதளங்களில் வெளியாகி அதிர்ச்சியை ஏற்படுத்தி உள்ளது
நாகப்பட்டினம் மேலக்கோட்டைவாசலை சேர்ந்தவர் சபரிராஜன் (55). இவர் பெருமாள் கோவில் அருகே உள்ள ஒரு டீக்கடையில் டீ குடித்து விட்டு, தனது வீட்டிற்கு நடந்து சென்றுள்ளார். அப்போது, மேலகோட்டை வாசல் பெட்ரோல் பங்க் அருகே நடந்து சென்ற போது, சற்றும் எதிர்பாராத நிலையில், அங்கு சாலையில் நின்று கொண்டிருந்த காளை மாடு ஒன்று திடீரென சபரி ராஜனை குத்தி தூக்கி வீசியது. இதனால் நிலை தடுமாறிய சபரிராஜன் அச்சமயம் திருவாரூரில் இருந்து நாகை நோக்கி வந்த அரசு பேருந்து சக்கரத்தில் விழுந்துள்ளார். இதில் பேருந்து பின் சக்கரம் சபரிராஜனின் தலையில் ஏறி இறங்கியதில் சம்பவ இடத்திலேயே அவர் பரிதாபமாக உயிரிழந்தார்.
பேருந்து சக்கரத்தில் சிக்கி ஒருவர் உயிரிழந்ததை கண்டு ஓட்டுனர் உள்ளிட்ட பயணிகள் அனைவரும் அதிர்ச்சி அடைந்தனர். இந்த சம்பவம் நாகையில் பெரும் அதிர்ச்சியை ஏற்படுத்தி உள்ளது. இதனிடையே, இது குறித்தான சிசிடிவி காட்சிகள் தற்போது சமூக வலைதளங்களில் பரவி பெரும் பரபரப்பை ஏற்படுத்தி உள்ளது.
இது குறித்து வழக்கு பதிவு செய்துள்ள நாகை நகர போலீசார், கால்நடைகளை சாலைகளில் சுற்றி திரியும் அளவுக்கு அலட்சியமாக இருந்த அதன் உரிமையாளரை தேடி வருகின்றனர்.
