எட்டையாபுரம் அருகே 3 இடங்களில் 3 கிலோ 600 கிராம் மின் இணைப்பு வயர்களை திருடியவரை போலீசார் கைது செய்தனர்.
தூத்துக்குடி மாவட்டம், எட்டையாபுரம் அருகே முத்துலாபுரம் எம்.கோட்டூர் பகுதியில் உள்ள பஞ்சாயத்து குடிநீர் மோட்டர் அறைக்கு மின் கம்பத்திலிருந்து இணைக்கப்படும் மின் இணைப்பு வயர்களும், அதே பகுதியில் உள்ள ஒருவரது வீட்டிற்கு மின் கம்பத்திலிருந்து இணைக்கப்படும் மின் இணைப்பு வயர்களும் மற்றும் அதே பகுதியில் உள்ள ஒரு மேல்நிலைப் பள்ளிக்கு மின் கம்பத்தில் இருந்து இணைக்கப்படும் மின் இணைப்பு வயர்களும் கடந்த 31.12.2022 அன்று அடுத்தடுத்து திருடுபோய் உள்ளது.
இதுகுறித்து முத்துலாபுரம் ஊராட்சி மன்ற தலைவரான எம்.கோட்டூர் பகுதியைச் சேர்ந்த முனியசாமி மகன் முனியசாமி (64) என்பவர் இன்று அளித்த புகாரின் பேரில் எட்டையாபுரம் காவல் நிலைய போலீசார் வழக்கு பதிவு செய்து காவல் உதவி ஆய்வாளர் முருகன் தலைமையிலான போலீசார் விசாரணை மேற்கொண்டதில் எம்.கோட்டூர் ஆர்.சி தெருவைச் சேர்ந்த பெருமாள் மகன் மாரீஸ்வரன் (25) என்பவர் மேற்படி 3 இடங்களில் மின் இணைப்பு வயர்களை திருடியது தெரியவந்தது.
இதனையடுத்து போலீசார் அவரை கைது செய்து அவரிடம் இருந்த திருடப்பட்ட 3 கிலோ 600 கிராம் மின் இணைப்பு வயர்களையும் பறிமுதல் செய்தனர். மேலும் இதுகுறித்து எட்டையாபுரம் காவல் நிலைய போலீசார் விசாரணை மேற்கொண்டு வருகின்றனர்.
