திருப்பூர் மாநகர் மாவட்ட எம்ஜிஆர் இளைஞர் அணி செயலாளரும், திருப்பூர் தெற்கு தொகுதி முன்னாள் எம்.எல்.ஏ., வுமான சு.குணசேகரன் சென்னை உயர் நீதிமன்றத்தில் பொது நல வழக்கு மனு ஒன்றை தாக்கல் செய்துள்ளார்.
வழக்கின் மனுவில் அவர் கூறியிருப்பதாவது:
திருப்பூர் பழைய பேருந்து நிலையம் ஸ்மார்ட் சிட்டி திட்டத்தின் கீழ் புதுப்பிக்கப்பட்டு பணிகள் நிறைவு பெரும் தருவாயில் உள்ளது. இந்த பேருந்து நிலையம் மத்திய, மாநில அரசுகளின் நிதி பங்களிப்புடன் ஸ்மார்ட் சிட்டி திட்டத்தில் அ.இ.அ.தி.மு.க. ஆட்சி காலத்தில் முன்னாள் முதலமைச்சர் மாண்புமிகு, எடப்பாடி.கே.பழனிச்சாமி அவர்களால் அடிக்கல் நாட்டப்பட்டது. அப்பொழுதே அந்த பேருந்து நிலையத்திற்கு தியாகி திருப்பூர் குமரன் பெயர் சூட்ட ஆலோசனை செய்யப்பட்டது.
மேலும், நானும் பொள்ளாச்சி சட்டமன்ற உறுப்பினர் பொள்ளாச்சி.வி.ஜெயராமன் மற்றும் பொது மக்கள் கடந்த 01.06.2022ம் தேதி திருப்பூர் மாநகராட்சி ஆணையரை நேரில் சந்திந்த்து திருப்பூர் பழைய பேருந்து நிலைய கட்டிடத்திற்கு சுதந்திர போராட்ட தியாகி கொடிகாத்த குமரன் பெயரை சூட்ட கோரிக்கை வைக்கப்பட்டது. அதன் பின்னர் கடந்த 24.06.2022ம் தேதியிட்டு திருப்பூர் மாநகராட்சி 3-ம் மண்டல உதவி ஆணையாளர் பொள்ளாச்சி.வி.ஜெயராமன் அவர்களுக்கு அனுப்பியுள்ள கடிதத்தில் "அரசு கட்டிடங்கள் பெயர் சூட்டுவது தொடர்பான கோரிக்கைகள் அரசின் கொள்கை முடிவிற்கு உட்பட்டது ஆகும் எனவும், தங்களது கோரிக்கையானது தற்போது பரீசீலிக்க இயலாது" என தெரிவித்திருந்தார்.
இந்நிலையில் திருப்பூர் மாநகராட்சியின் மாமன்ற அவசர கூட்டம் 29.08.2022ம் தேதியன்று கூட்டப்பட்டது. அதில் 289-வது பொருள் அட்டவணையில்,
289) இம்மாநராட்சியின் மண்டலம் எண்:03, பழைய வார்டு எண்:45, புதிய வார்டு எண்.44, காமராஜ் சாலையில் நிலையில் இருந்த பேருந்து நிலையத்தினை முழுமையாக இடித்து அப்புறப்படுத்திவிட்டு, ஸ்மார்ட் சிட்டி திட்டத்தில் புதிதாக கட்டியுள்ள பேருந்து நிலையத்திற்கு "முத்தழிழறிஞர் டாக்டர்.கலைஞர் மத்திய பேருந்து நிலையம், திருப்பூர் மாநகராட்சி" என பெயர் சூட்ட திருப்பூர் மாமன்ற மாண்புமிகு மேயர் திரு.ந.தினேஷ்குமார் அவர்களால் 26-05-2022-ல் கோரிக்கை கடிதம் அளிக்கப்பட்டது. மேலும் 30-05-2022 அன்று திருப்பூர் மாமன்ற கூட்டத்தில் நடைபெற்ற மாமன்ற சாதாரணக் கூட்டத்தில் மேற்கண்ட கோரிக்கை மாண்புமிகு மேயர் அவர்களால் பொதுத் தீர்மானமாக கொண்டு வரப்பட்டு, பெரும்பான்மையான மாமன்ற உறுப்பினர்களால் ஆமோதிக்கப்பட்டு, அரசினருக்கு உரிய முன்மொழிவுகள் அனுப்ப தீர்மான நிறைவேறப்பட்டது. மேற்படி முன்மொழிவுகள் அரசினரின் பரிசீலனைக்கு சமர்ப்பித்ததன் பேரில் மாமன்றத்தின் ஒப்புதலுக்கு தீர்மானம் வைத்திட அரசு செயலாளர், நகராட்சி நிர்வாகம் மற்றும் குடிநீர் வழங்கல் துறை(மா.ந.7) சென்னை அவர்களது 24-08-2022ம் தேதிய அரசு கடிதம் எண்.14507/ மாந7/ 2022-1-ல் அனுமதி அளிக்கப்பட்டுள்ளது. எனவே, காமராஜ் சாலையில் புதிதாக கட்டப்பட்டுள்ள பேருந்து நிலையத்திற்கு "முத்தமிழறிஞர் டாக்டர். கலைஞர் மத்திய பெருந்து நிலையம், திருப்பூர் மாநகராட்சி" என பெயர் சூட்ட மாமன்றத்தின் அனுமதிக்கு.
அலுவலகக் குறிப்பு:
மாமன்றம் அனுமதி வழங்கலாம் (அ1/7758/2021)
என குறிப்பிடப்பட்டு தீர்மானம் நிறைவேற்றப்பட்டதாக அறிகிறேன்.
நமது இந்திய தேசம் 75-வது சுதந்திர தின விழாவை கொண்டாடி வரும் இந்த நிலையில், உயிர் பிரியும் வரை கையில் தேசிய கொடி ஏந்தி திருப்பூரின் பெருமையை இந்திய தேசம் எங்கும் கொண்டு சேர்த்த சுதந்திர போராட்ட தியாகி கொடிகாத்த குமரன் பெயரை சூட்டுவது தான் பொருத்தமாக இருக்கும்.
எனவே, ஐயா அவர்கள் மேற்படி தீர்மானத்தை ரத்து செய்ய தக்க நடவடிக்கை எடுத்து திருப்பூர் பழைய பேருந்து நிலையத்திற்கு கொடி காத்த குமரன் பேருந்து நிலையம் என பெயர் சூட்டுமாறு பணிவுடன் கேட்டுக்கொள்கிறேன்.
இவ்வாறு அந்த மனுவில் கூறப்பட்டு இருந்தது.
இந்த பொது நல வழக்கு மனுவானது 5 ஆம் தேதி சென்னை உயர் நீதிமன்றத்தில் நீதிபதி பரேஷ் உபாத்யாய் தலைமையிலான அமர்வில் விசாரணைக்கு வந்தது. அந்த வழக்கை அவர் தலைமை நீதிபதி அமர்வுக்கு மாற்றி உத்தரவிட்டு இருக்கிறார். மீண்டும் அந்த மனு சென்னை உயர் நீதிமன்றத்தில் தலைமை நீதிபதி அமர்வில் 8 ஆம் தேதி விசாரணைக்கு வர உள்ளது. திருப்பூர் பழைய பேருந்து நிலையம் பணிகள் முடிந்து திறப்பு விழாவிற்கு தயார் நிலையில் உள்ள வேளையில் சென்னை உயர் நீதிமன்றத்தில் இந்த வழக்கு தாக்கல் செய்யப்பட்டு இருப்பது குறிப்பிடத்தக்கது.
