விவசாயிகளின் பயிர்காப்பீடு பணத்தை மனைவி, பிள்ளை, உறவினர்கள் மற்றும் தனது பெயரில் பெற்று மோசடி செய்த விஏஓவை உழவன் செயலி காட்டிக்கொடுத்ததால் சஸ்பென்ட் செய்யப்பட்டுள்ளார்
மயிலாடுதுறை மாவட்டம் அகரகீரங்குடி ஊராட்சியில் உள்ளது முட்டம் கிராமம். இக்கிராமத்தில் கடந்த 2020-ஆம் ஆண்டு சுமார் 450 ஏக்கர் நிலப்பரப்பில் விவசாயிகள் சம்பா சாகுபடி செய்து இருந்தனர்.
அந்த சாகுபடி பயிர்களுக்கு அப்பகுதியை சேர்ந்த ஏராளமான விவசாயிகள் சிட்டா, அடங்கலுடன் கிராம நிர்வாக அலுவலர் திருமலைசங்கு என்பவரிடம் சமர்ப்பித்து இருந்தனர்.
அந்த பருவத்தில் பெய்த கனமழையின் காரணமாக சம்பா பயிர்களுக்கான இழப்பீட்டுத் தொகையாக ஏக்கருக்கு 68 சதவீதத் தொகையாக ரூ.22,000-த்தை காப்பீட்டு நிறுவனம் அறிவித்தது.
இந்த காப்பீட்டுத் தொகையானது 4-இல் ஒருபங்கு விவசாயிகளுக்கு வந்து சேரவில்லை. இதையடுத்து, இழப்பீட்டுத் தொகை கிடைக்காத விவசாயிகள் வேளாண்துறை அதிகாரிகளை அணுகியுள்ளனர்.
அவர்களிடம் உழவன் செயலியை பயன்படுத்தி காப்பீட்டுத் தொகை வழங்கப்பட்டுள்ளதா? என்பதை தெரிந்து கொள்ளலாம் என அதிகாரிகள் விளக்கி விழிப்புணர்வு ஏற்படுத்தி உள்ளனர்.
இதையடுத்து உழவன் செயலியில் பார்த்த விவசாயிகளுக்கு பெரும் அதிர்ச்சி ஏற்பட்டது. அதில், அதே புல எண்ணில் வேறொரு நபருக்கு தொகை செலுத்தப்பட்டு இருந்தது தெரிய வந்தது.
இதையடுத்து, அந்த நபர்கள் யார் எனப்பார்த்ததில், அவர்கள் அனைவருமே கிராம நிர்வாக அலுவலர் திருமலைசங்குவின் மனைவி, மகள் மற்றும் உறவினர்கள் என்பது தெரிய வந்தது.
மேலும் அதிர்ச்சியாக சிலரது புல எண்ணுக்கான காப்பீட்டுத் தொகை கிராம நிர்வாக அலுவலர் திருமலைசங்குவின் பெயருக்கே வரவு வைக்கப்பட்டிருந்தது. மேலும், விவசாயிகளின் நிலத்தின் பேரில் வங்கியில் பயிர்க்கடன் பெற்று அதற்கு விவசாய தள்ளுபடியையும் பெற்றுள்ளதாகவும் கூறப்படுகிறது.
இதையடுத்து அவரிடம் நேரில் சென்று விவசாயிகள் கேட்டபோது அவர் அலட்சியமாக பதிலளித்ததாக கூறப்படுகிறது. இதையடுத்து, பாதிக்கப்பட்ட விவசாயிகள் மயிலாடுதுறை மாவட்ட ஆட்சியர் அலுவலகத்தில் புகார் அளித்தனர்.
இதுகுறித்து மாவட்ட வருவாய் அலுவலர் முருகதாஸ் உத்தரவின்பேரில் மயிலாடுதுறை கோட்டாட்சியர் பாலாஜி விசாரணை மேற்கொண்டு வருகிறார். ஒரு சில ஆவணங்களை சரிபார்த்ததில் வி.ஏ.ஓ திருமலை சங்கு போலி ஆவணங்கள் மூலம் மோசடி செய்தது தெரிய வந்தது.
இதையடுத்து வி.ஏ.ஓ திருமலைசங்கு பணியிடை நீக்கம் செய்து கோட்டாட்சியர் பாலாஜி அதிரடியாக உத்தரவிட்டார். இந்த விவகாரம் மயிலாடுதுறையில் பெரும் பரபரப்பை ஏற்படுத்தி உள்ளது.
செய்தியாளர் அகமது ஜான் புகைப்படக்காரர் சாதிக்
